सोलु दूधकोसी आयोजनाको ठाडो सुरुङबाट खस्दा २ कामदार घाइते

काठमाडौं । सोलुखम्बुमा निर्माणाधीन ८६ मेगावाटको सोलु दूधकोसी जलविद्युत आयोजनाको ठाडो सुरुङबाट खसेर २ जना कामदार घाइते भएका छन् । आयोजनाको निर्माणाधीन ठाडो सुरुङबाट १६० मिटर तल खसेर उनीहरू घाइते भएका  हुन् ।

ठाडो सुरुङमा पाइप निकाल्ने क्रममा क्रेन भाँचिएर उनीहरू सुरुङभित्र खसेको जिल्ला प्रहरी कार्यालय सोलुखुम्बुका प्रहरी निरीक्षक ऋषिराज ढकालले बताए । उनका अनुसार बिहान करिब ४ बजे पाइप निकाल्ने क्रममा यो दुर्घटना भएको हो ।  

घाइते हुनेमा पर्साको कोटेश्वर गाउँपालिकाका २० वर्षीय अंकित चौधरी र बाराको कोहोल्बी नगरपालिकाका २२ वर्षिय राकेश चौधरी छन् । अंकितको उद्दारपछि ओखलढुङ्गास्थित मिसन अस्पतालमा उपचार भइरहेको छ । राकेशको उद्दार प्रयास भइरहेको प्रहरीले जनाएको छ ।

यो आयोजनामा भएको दोस्रो दुर्घटना हो । यसअघि गत आयोजनामा गत पुस ११ गते भएको दुर्घटनामा २ जना इन्जिनियरको मृत्यु भएको थियो ।परीक्षणका क्रममा आयोजनाको पेनस्टक पाइप पड्किएर आयोजनामा कार्यरत अछामका २६ वर्षीय सुवासराज रेग्मी र काभ्रेका २९ वर्षीय अर्जुन थापाको मृत्यु भएको थियो ।