ऊर्जा खबर
काठमाडौँ । चार दिनसम्म पानीको उच्च बहाव जोखिमका कारण बन्द रहेको कालीगण्डकी ‘ए’ जलविद्युत् आयोजनाले सोमबारबाट उत्पादन पुनः सुरु गर्ने तयारी गरेको छ ।
कालीगण्डकी नदीमा पानीको बहाव घटेसँगै १४४ मेगावाट क्षमताको कालीगण्डकी ‘ए’ जलविद्युत् आयोजनाले सोमबार बिहानबाट उत्पादन पुनः सुरु गर्ने जनाएको छ ।
कालीगण्डकी–५ बेल्टारीस्थित आयोजनामा बाढीको बहाव उच्च भएपछि जोखिमबाट जोगिन विद्युत् उत्पादन बन्द गरिएको थियो । आइतबार रातीबाट पानी पर्न कम भएसँगै नदीको सतह घट्दै गएपछि सुरुङभित्र जमेको हिलो हटाउने र पावर हाउसको अवस्था निरीक्षण गरेर उत्पादन सुरु गर्न लागिएको हो ।
आयोजना प्रमुख आत्मेस पौडेलका अनुसार प्राविधिक टोलीले बाढीपछिको अवस्थाको निरीक्षण गरिसकेकाले सोमबार बिहानदेखि विद्युत् उत्पादन सुरु गर्न सकिने सम्भावना रहेको छ । कालीगण्डकीमा बाढी आएपछि मिर्मीस्थित बाँधका सबै ढोका खोलेर पानी नदीमा छाडिएको थियो ।
आयोजनाको बाँधस्थलभन्दा केही तल स्याङ्जा र गुल्मी जोड्ने मोटरेबल पुलसमेत आइतबार बिहान कालीगण्डकीको बाढीले बगाएको थियो ।
लगातारको वर्षासँगै कालीगण्डकीमा आएको बाढीले स्याङ्जा, पर्वत र गुल्मीको सङ्गमस्थल सेतीवेणी बजारसमेत डुबानमा परेको छ । बजारका २६ घरका बासिन्दालाई नजिकैको विद्यालयमा सारिएको छ ।
