ऊर्जा खबर
काठमाडौँ । भोटेकोसी बाढीपछि सम्पर्कविहीन भएका माथिल्लो त्रिशुली ३ ‘बी’ जलविद्युत् आयोजनामा कार्यरतहरूको खोजी तथा उद्धारका लागि एउटा टोली आयोजना क्षेत्रमा पुगेको छ । स्थलमार्गको सम्पर्क टुटेकोले टोली हेलिकप्टरमार्फत टोली क्षतिग्रस्त आयोजना स्थल पुगेको हो ।
आयोजना प्रवर्द्धक त्रिशूली जलविद्युत् कम्पनी लिमिटेडका प्रमुख कार्यकारी अधिकृत (सिइओ) आनन्द ढुङ्गेलसहित कम्पनीका ३ जना र नेपाली सेनाका १६ जना गरी १९ जनाको उद्धार टोली आयोजनाको आवास तथा कार्यालय क्षेत्रमा खटिएको छ । हाल टोलीले उक्त क्षेत्रमा उत्खनन गरी उद्धार तथा खोज गर्ने तयारी गरिहेको सिइओ ढुङ्गेलले जाकारी दिए ।
यसअघि कम्पनीले आयोजना क्षेत्रबाट हराएका कर्मचारी तथा कामदार मध्ये ९१ जनाको उद्धार भएको तथा प्रयोगात्मक अभ्यासमा गएका विद्यार्थीसहित १२२ जना सम्पर्कविहीन रहेको विवरण सार्वजनिक गरेको थियो ।
