ऊर्जा खबर
काठमाडौँ । बाँकेमा ३० मेगावाट क्षमताको न्यू नेपालगन्ज सौर्य विद्युत् आयोजना निर्माण हुने भएको छ । यसका लागि आयोजनाको प्रवर्द्धक कम्पनी सोल पावर लिमिटेडले उत्पादन अनुमतिपत्रको माग गर्दै विद्युत् विकास विभागमा आवेदन दिएर प्रक्रिया अघि बढाएको हो ।
आयोजनाको प्रारम्भिक वातावरणीय अध्ययन प्रतिवेदन (आइइई) २०८३ असार ४ गते स्वीकृत भएको थियो । आइइईअनुसार बाँकेको बैजनाथ गाउँपालिका–७ र खजुरा गाउँपालिका–४ को करिब ३०.४७ हेक्टर क्षेत्रफलमा रहने यस आयोजनाको जडित क्षमता ३० मेगावाट रहनेछ ।
आयोजनामा जडान गरिएका सोलर फोटोभोल्टाइक प्यानलहरूबाट उत्पादित विद्युत्लाई २५५ किलोवाटका १०८ वटा र ३५ किलोवाटका ३ वटा स्ट्रिङ इन्भर्टरमार्फत करिब ३० मेगावाट विद्युत्मा परिणत गरिने छ । आयोजनाबाट वार्षिक औसत ५९.९२२ गिगावाट घण्टा विद्युत् उत्पादन हुने अनुमान गरिएको छ । उत्पादित विद्युत्लाई ३३ केभी प्रसारण लाइनमार्फत नेपाल विद्युत् प्राधिकरणको न्यू नेपालगन्ज ग्रिड सबस्टेसनमा जोडिनेछ ।
आयोजना २०८३ माघभित्र निर्माण सम्पन्न गर्ने कम्पनीको लक्ष्य छ । आयोजना निर्माण तथा सञ्चालन गर्दा वातावरणमा कुनै उल्लेखनीय प्रतिकूल प्रभाव पर्ने देखिए ३५ दिनभित्र विद्युत् लिखित राय प्रतिक्रिया दिन आग्रह गर्दै विभागले बुधबार सूचना जारी गरेको छ ।
