कोहलपुर–सुर्खेत प्रसारण लाइनमा स्थानीयलाई उचित क्षतिपूर्ति दिएर काम गर्न मन्त्री खड्काको निर्देशन

काठमाडौँ । ऊर्जा, जलस्रोत तथा सिँचाइ मन्त्री दीपक खड्काले कोहलपुर–सुर्खेत १३२ केभी प्रसारण लाइनअन्तर्गत बाँकेको बानियाँभार क्षेत्रमा देखिएको विवाद समाधान गर्न निर्देशन दिएका छन् । आज आयोजना प्रमुख रविकुमार चौधरीसँग आयोजनाको प्रगतिका विषयमा जानकारी लिँदै उक्त क्षेत्रमा देखिएको समस्या तत्काल समाधान गर्न निर्देशन दिएका हुन् ।

बाँकेको बैजनाथ गाउँपालिका-४ बानियाँभार क्षेत्रमा स्थानीयको अवरोधका कारण तीन वटा विद्युत् टावर निर्माणको काम रोकिएको छ । 'स्थानीयवासीले राखेका मागलाई उचित सम्बोधन गरेर आयोजनालाई तत्काल अगाडि बढाउनुहोस्, विकासको कामलाई अगाडि बढाउँदै गर्दा सामान्य मान्छे नमरोस्,' उनले भने, 'आयोजनाभित्र परेका घरलाई उचित क्षतिपूर्ति दिँदा पीडितको पुनर्बासको सुनिश्चितता हुनुपर्छ ।'

आयोजना प्रमुख चौधरीले स्थानीयबासीको अवरोधका कारण आयोजना अगाडि बढाउन नसकिएको जानकारी गराएका थिए । २‎‎०७७ साल भदौ ७ गते ठेक्का भई दुई वर्षभित्र प्रसारण लाइनको निर्माण, डिजाइन, परीक्षण, वितरणदेखि प्लान्टको खरिदसम्मका काम गरिसक्नुपर्ने सम्झौता थियो । यद्यपि, स्थानीय अवरोधका कारण काममा ढिलाइ भइरहेको छ ।