ऊर्जा खबर
काठमाडौं । सिंगटी हाइड्रो इनर्जी प्रालिले साधारण सेयर बाँडफाँड गरेको छ । कम्पनीले दोलखामा निर्माण सम्पन्न गरेकाे २५ मेगावाटको सिंगटी जलविद्युत आयोजनाको साधारण सेयर शुक्रबार (आज) बाँडफाँड गरेको हो ।
गत चैत्र ६ देखि १० गतेसम्म निष्कासन गरेको सेयर बाँडफाड गरिएको कम्पनीका सञ्चालक बटु लामिछानेले बताए । उनका अनुसार आवेदकमध्ये २ लाख ६९ हजार ७ सय जनाले मात्रै गोलाप्रथाबाट कम्पनीकाे १० कित्ता सेयर पाएका छन् ।
कम्पनीकाे सेयर किन्न १५ लाख ६५ हजार ५ सय ३० जनाले १५ करोड ६५ लाख ५३ हजार रुपैयाँ बराबरको १५ लाख ६५ हजार ५ सय ३० कित्ताका लागि आवेदन दिएका थिए । साधारण सेयरका लागि परेकाे आवेदन माग भन्दा ९ गुणा बढी हो ।
कम्पनीले प्रतिकित्ता १ सय रुपैयाँ अंकित मूल्यको २९ लाख कित्ता सेयर सर्वसाधारणलाई निष्कासन गरेको थियो । निष्कासन गरेको सेयरमध्ये ५८ हजार कित्ता अर्थात् २ प्रतिशत सेयर कम्पनीमा कार्यरत कर्मचारीका लागि सुरक्षित गरिएको थियो ।
१ करोड ४५ लाख रुपैयाँ बराबरको १ लाख ४५ हजार कित्ता अर्थात् ५ प्रतिशत सेयर सामूहिक लगानी कोषका लागि छुटट्याइएको थियो । बाँकी २६ करोड ९७ लाख रुपैयाँ बराबरको २६ लाख ९७ हजार कित्ता सेयर सर्वसाधारणका लागि खुल्ला गरिएको थियो ।
कम्पनीले यसअघि पनि आयोजना प्रभावित स्थानीयका लागि छुट्याएको १४ करोड ५० लाख रुपैयाँ बराबरको १४ लाख ५० हजार कित्ता सेयर निष्कासन गरी बाडफाँड गरिसकेको छ । स्थानीयका लागि छुट्याइएको सेयरका लागि पनि मागभन्दा बढी आवेदन परेको थियो ।
कम्पनीले लगानी गरेको सिंगटी खोलाको निर्माण सम्पन्न भई परीक्षणसमेत सकिएको छ । १३२ केभी सिंगटी–लामोसाँघु प्रसारण लाइन पूरा भइनसकेकाले आयोजनाको विद्युत प्रणालीमा जोडिन सकेको छैन ।
प्रसारण लाइनको काम अन्तिम चरणमा पुगेकाले २०७८ बैशाख महिनाभित्र आयोजनाबाट विद्युत उत्पादन सुरु हुँदैछ । आयोजना सञ्चालनमा आएपछि विद्युत बिक्रीबाट वार्षिक ७० करोड रुपैयाँ आम्दानी हुनेछ ।
