ऊर्जा खबर
काठमाडौं । देशभरमा ४ लाख ३३ हजार बायोग्यास प्रविधि जडान भएको छ । घरयासी बायोग्यास ग्रामीण क्षेत्रमा खाना पकाउन उत्तम प्रविधि साबित भएकोले यसको लोकप्रियता बढ्दै गएको हो ।
महालेखापरीक्षले हिजो (असार २९ गते) सार्वजनिक गरेको ५९ औं वार्षिक प्रतिवेदनमा उक्त संख्याको बायोग्यास प्लान्ट जडान भएको छ । पन्ध्रौ योजना अन्तर्गतको २०७७/७८ मा घरयासी बायोग्यास प्लान्ट ५ लाख १ हजार जडान गर्ने लक्ष्य राखिएको थियो ।
तर, लक्ष्य भन्दा ६८ हजार कम बायोग्यास प्लान्ट जडान भएको प्रतिवेदनमा उल्लेख छ । गोबरबाट निस्कने ग्यासले वातावरण प्रदुषण रोक्नुका साथै ग्रामीण महिलाको स्वास्थ्यमा सुधार भएकोले यो प्रविधिको विस्तार हुँदै गएको छ ।
यस्तै, सौर्य मिनी ग्रिड ६०० पुर्याउने लक्ष्य रहेकोमा २५ मात्र जडान भएको छ । सरकारले हालसम्म वैकल्पिक ऊर्जाबाट २०७७/७८ भित्र १४५ मेगावाट पुर्याउने लक्ष्य थियो । तर, ७५ मेगावाट मात्र विद्युत उत्पादन भएको छ । लघु तथा साना जलविद्युत, सौर्य/वायु मिनी ग्रिडमार्फत विद्युत उत्पादन गरी दुर्गमा गाउँमा विद्युतीकरण गरिरहेको छ ।
