ऊर्जा खबर
काठमाडौँ । धनुषामा निर्माण हुने ३० मेगावाटको ढल्केबर–२ सौर्य विद्युत् आयोजनाका लागि ऋण लगानी जुटेको छ । इन्टिग्रेटेड इन्जिनियरिङ एन्ड इन्डस्ट्रियल इन्टरप्राइजेजले प्रवर्द्धन गर्न लागेको आयोजनाका लागि एभरेस्ट बैंक र नेपाल एसबीआई बैंकले उक्त ऋण लगानी गर्ने सम्झाैता भएको हो ।
आयोजनाको कुल लागत १ अर्ब ९५ करोड ५६ लाख रुपैयाँ रहने अनुमान गरिएको छ । यसमध्ये ७० प्रतिशत अर्थात् १ अर्ब ३६ करोड ८० लाख रुपैयाँ बैंकहरूले ऋण लगानी गर्ने छन् । बाँकी ३० प्रतिशत अर्थात् ५८ करोड ७६ लाख रुपैयाँ स्वपुँजीबाट व्यवस्थापन गरिने प्रवर्द्धक कम्पनीले जनाएको छ ।
प्रवर्द्धक कम्पनीका अनुसार आयोजनाका लागि २०८२ पुसमा नेपाल विद्युत् प्राधिकरणसँग विद्युत् खरिद–बिक्री सम्झौता (पिपिए) गरिसकेको छ । त्यस्तै, २०८३ भदौमा विद्युत् विकास विभागमा विद्युत् उत्पादनको अनुमतिपत्रका लागि आवेदनसमेत पेस गरिसकेको छ । लगानी सम्झौता सम्पन्न भएसँगै आयोजनाको वित्तीय व्यवस्थापनतर्फको महत्त्वपूर्ण चरण पूरा भएको कम्पनीले जनाएको छ ।
आयोजना सञ्चालनमा आएपछि वार्षिक करिब ५ करोड ९९ लाख युनिट विद्युत् उत्पादन हुने अनुमान गरिएको छ । आयोजनाबाट उत्पादित विद्युत् करिब १.७ किलोमिटर लामो प्रसारण लाइनमार्फत नेपाल विद्युत् प्राधिकरणले सञ्चालन गर्दै आएको ढल्केबर सबस्टेसनमा जोडेर राष्ट्रिय प्रसारण प्रणालीमा प्रवाह गरिनेछ ।
आयोजनाको निर्माण सुरु भएको एक वर्षभित्र सम्पन्न गर्ने लक्ष्य लिइएको छ ।
