ऊर्जा खबर
काठमाडौँ । गुल्मी हाइड्रो प्रालिले म्याग्दीमा १.८६ मेगावाटको तल्लो रुप्से खोला जलविद्युत् आयोजना निर्माण गर्ने भएको छ । यसका लागि उत्पादन अनुमतिपत्रको माग गर्दै कम्पनीले विद्युत् विकास विभागमा आवेदन दिई प्रक्रिया अघि बढाएको छ ।
जिल्लाको अन्नपूर्ण गाउँपालिका–३ भएर बग्ने रुप्से खोलाको पानीलाई सदुपयोग गर्दै आयोजना निर्माण गर्न लागिएको हो । आयोजनाको डिजाइन बहाब १.८६ घनमिटर प्रतिसेकेन्ड र ग्रस हेड १२६ मिटर रहने छ । खोलाको पानी विद्युत्गृहसम्म लैजान रुप्से खोलामा १६ मिटर लम्बाइ र २.४ मिटर उचाइको बाँध निर्माण गरिने आयोजनाले जनाएको छ ।
आयोजनाबाट वार्षिक औसत ११.८२ गिगावाट घण्टा विद्युत् उत्पादन गर्ने लक्ष्य छ । आयोजनाबाट उत्पादन हुने विद्युत् करिब १.५ किलोमिटर लामो ३३ केभी सिङ्गल सर्किट प्रसारण लाइनमार्फत दाना सबस्टेसनमार्फत् राष्ट्रिय प्रसारण लाइनमा जोड्ने योजना छ । आयोजनाको निर्माण २०८५ साल साउनभित्र पूरा गर्ने लक्ष्य राखिएको छ ।
