बाढीका कारण हेवा खोला ‘ए’ पूर्ण रूपमा क्षतिग्रस्त (फोटो फिचर समेत)

काठामाडौं । असार सुरु भए यताको अवीरल वर्षासँगै आएको बाढीले पाँचथरको हेवा खोलामा सञ्चालित १४.९ मेगावाटको हेवा खोला ‘ए’ जलविद्युत आयोजनामा पूर्णरूपमा क्षति पुर्याएको छ । असार १ र २ गते आएकाे बाढीले  विद्युतगृह, बाँधलगायतका संरचनामा ठूलो क्षति पुर्याएको हो ।

बाढीले पुर्याएको क्षतिको पुनर्निर्माण गरी सञ्चालनमा ल्याउन ९ महिनादेखि एक वर्ष लाग्ने प्रवर्द्धक पाँचथर पावर कम्पनीका वित्तिय व्यवस्थापक सुन्दरमनी सुवेदीले बताए । ‘बाढीले केन्द्रको सबै संरचनामा क्षति पुर्याएको छ, अहिले विद्युतगृह पुरै बन्द छ,’ उनले भने, ‘क्षतिको यकिन गर्न सकिएको छैन, आयोजनास्थल जाने बाटो बन्द भएकोले जना सकिएको छैन ।’ आयोजनाको निरीक्षण तथा अध्ययनका लागि सर्वेक्षक पठाउने तयारी भइरहेको कम्पनीले जनाएको छ ।