१३ मेगावाटको अप्पर सेती–१ निर्माण गर्दै श्रेष्ठ इनर्जी, ३ वर्षमा सम्पन्न गर्ने लक्ष्य

काठमाडौं । श्रेष्ठ इनर्जी सोलुसन प्रालिले कास्कीमा १३ मेगावाटको अप्पर सेती–१ जलविद्युत आयोजना निर्माण गर्ने भएको छ । कम्पनीले जिल्लाको पोखरा महानगरपालिका र माछापुच्छ्रे गाउँपालिकामा उक्त आयोजना निर्माण गर्न लागेको हो ।

कम्पनीले आयोजना निर्माण गर्न विद्युत विकास विभागमा आवेदन दिएको छ । कम्पनीका अनुसार विभागबाट स्वीकृत प्राप्त हुने लगतै आयोजना निर्माण प्रक्रियाकाे काम अघि बढाइनेछ ।

विभागले आयोजना निर्माण तथा सञ्चालन गर्दा पर्न सक्ने प्रतिकुल असरबारे सरोकारवालासँग राय/सुझाव माग गरेको छ । विभागले ३५ दिने सूचना जारी गर्दै उक्त अवधिभित्र सुझाव दिन  माग गरेको हो ।

नदी प्रवाहीमा आधारित (रन अफ रिभर) प्रकारको आयोजनाको डिजाइन बहाव १५ घनमिटर प्रति सेकेन्ड र कुल हेड ११७.१५ मिटर हुने अध्ययनले देखाएको छ । आयोजनाबाट वार्षिक सरदर ८२.६२ गिागावाट घण्टा विद्युत उत्पादन हुनेछ । आयोजनको बाँधस्थल सेती नदीको बाँया किनारमा रहनेछ  विद्युत गृहमा जडित ५.१६५ क्षमताको ३ फेज जनेरेटर मार्फत विद्युत उत्पादन गरिनेछ ।

उत्पादित विद्युतलाई ३३ केभी प्रसारण लाइन मार्फत नेपाल विद्युत प्राधिकरणको ३.५ किलोमिटरको दुरीमा रहेको लाहाचोक सबस्टेसनमा जोडिनेछ ।

यो आयोजनाबाट २०८२ सालबाट विद्युत उतपादन गर्ने लक्ष्य राखेको छ । आयोजना निर्माण तथा सञ्चालन गर्दा भू–क्षय, वायु प्रदुषण् आदिद्वारा वातावरणमा उल्लेखनीय प्रतिकुल असर नपर्ने गरी निर्माण गरिनेछ ।