ऊर्जा खबर
काठमाडौं । जलविद्युतमा लगानी गर्दै आएको हाइड्रो इलेक्ट्रिसिटी इनभेष्टमेन्ट एन्ड डेभलपमेन्ट कम्पनीले शतप्रतिशत (१ः१ अनुपात) हकप्रद सेयर निष्कासन गर्ने अनुमति पाएको छ । नेपाल धितोपत्र बोर्डले ११ करोड कित्ता हकप्रद सेयर निष्कासन गर्न आइतबार अनुमति दिएको हो ।
बोर्डको अनुमतिपछि अब कम्पनीले संस्थापक र सर्वसाधारण सेयरधनीका लागि प्रतिकित्ता १ सय रुपैयाँ अंकित्त ११ अर्ब रुपैयाँ बराबरको हकप्रद सेयर निष्कासन गर्नेछ । बाँकी प्रक्रिया पूरा गरेर चाँडै चुक्ता पुँजीको १ः१ अनुपातको सेयर निष्कासन गरिने कम्पनीले जनाएको छ । सेयर निष्कासन गरी बाँडफाँड गर्न ग्लोबल आइएमई क्यापिटललाई बिक्री प्रबन्धक नियुक्त गरिएको छ ।
कम्पनीले अहिले ५ वर्षे व्यावसायिक कार्ययोजना कार्यान्वयन गरिरहेको छ । जसअनुसार आव २०७८र७९ सम्म ३ हजार ३ सय ३९ मेगावाटका २३ आयोजनाहरूमा १० अर्ब ७६ करोड रुपैयाँ स्वपुँजी लगानी गर्ने लक्ष्य राखेको छ । यस्तै, सोही अवधिमा १२ अर्ब ६७ करोड रुपैयाँ ऋण लगानी गर्ने योजना छ ।
कम्पनीले हालसम्म ४ सय ७६ मेगावाटका १३ आयोजनामा १० अर्ब ८८ करोड ऋण लगानी गरेको छ । ती मध्ये ९०।६ मेगावाटका ४ आयोजना सञ्चालनमा आइसकेका छन् । यही आवभित्र १ सय ८२ मेगावाटका आयोजनाबाट विद्युत् उत्पादन हुँदैछ ।
हालसम्म कम्पनीले १५ सय ४० मेगावाटका ५ आयोजना र ४ सम्बन्धित कम्पनीहरूमा ९ अर्ब ४५ करोड रुपैयाँ स्वपुँजी लगानी गरेको छ । उता पावर चाइनासँगको सहकार्यमा १ सय ५६ मेगावाटको माडी जलाशय र ७ सय ५६ मेगावाटको तमोर जलाशय निर्माण गर्न सम्झौता गरेको छ ।
