ऊर्जा खबर
काठमाडौं । कृषि कर्जा मेलामा नबिल बैंकले दिगो बैकिङमार्फत प्रवर्द्धन गर्ने भएको छ । आज (बिहीबार) देखि चितवन एक्स्पो सेन्टर, भरतपुरमा सुरु भएको बहुप्रतिक्षित कृषि कर्जा मेलामा बैंकले दिगो बैंकिङ मार्फत प्रवद्र्धन गर्ने भएको हो । मेला चैत १२ गते (शनिबार) सम्म चल्नेछ ।
कार्यक्रमको उद्घाटनमा नबिल बैंकका अध्यक्ष तथा ‘ग्लोबल एलायन्स फर बैंकिङ अन भ्याल्यु’ का एशिया प्यासीफीक प्रतिनीधि उपेन्द्र पौडेलले निक्षेपकर्ताको पैसा सुरक्षित भएको र सम्भावित लगानी क्षेत्रमा कर्जा दिन बैंक तयार भएको बताए । उनका अनुसार मुल्य श्रृंखला बनाउन सके कृषिमा लगानी बढ्नेछ ।
‘नबिल बैंकले दिगो बैंकिङ अगाडी बढाएको छ, त्यसको प्रमुख कार्यक्रम कृषि हो’, उनले भने, ‘हाम्रो उर्भर जमिन भोलि रहन्छ की रहँदैन, भोलिको दिनमा सन्ततीको भविष्यलाई नविगारी अहिले विकास गर्ने हो, जुन दिगो विकास हो ।’ उनले कृषि क्षेत्रमा बैंकले लगानी नगरेको भए यति परिवर्तन नहुने दाबी गरे ।
‘कृषि क्षेत्रको विकासको लागि बैंकहरुले जति प्रभाव पारेको छ त्यो भन्न सकेको छैनौ, भोलिको दिनमा कृषि क्षेत्रको विकासमा परेको प्रभाव भन्न सक्ने गरि अगाडी बढौ’, उनले भने, ‘बैंकले निक्षेपकर्ताको पैसा फिर्ता हुने गरी हेरेर लगानी गर्ने हो, कृषिमा लगानी गर्दा निक्षेपकर्ताको पैसा सुरक्षित छ भन्नेगरि मुल्य श्रृंखला निमार्ण गरौं, बैंकले कृषिमा लगानी गर्छन् ।’
कृषिमा समग्र ‘इको सिस्टम’ र ‘भ्यालु चेन’ मा नै समस्या रहेको बैंकका प्रमुख कार्यकारी अधिकृत अनिल केशरी शाहले बताए । उनका अनुसार धेरै ठाउँमा जाँदा तपाइहरु किसानलाई कर्जा दिनु हुँदैन, बैंकले कर्जा दिएको भए किन युवा विदेश जानुपर्थ्यो, घरजग्गा र सेयरमा कर्जा दिनुहुन्छ तर किसानलाई पैसा दिनुहुन्न भन्ने गरेको सुनिन्छ ।
‘बैंकले ‘नबिल दिगो बैंकिङ’ गरेर हाम्रो टिमलाई गाउँमा किसँनसँग पठायौं, गाउँमा खेत त छ तर किसान साउदी, मलेसीया र जापानमा रहेछन् । जो किसान रहेछन् उनिहरुले पैसा रोपेर केही हँुदैन बीज चाहियो भन्ने रहेछन्’, उनले भने, ‘बिज भए पुग्छ भन्दा मल पनि चाहियो, बिज र मल भएपछि हुन्छ भन्दा अब बजार पनि चाहियो भने गुनासो गरे, हाम्रो टिम आएर किसानलाई पैसा मात्रै दिएर नहुने रहेछ बीज, मल, पानि र बजारिकरण पनि चाहिने रहेछ भन्ने गुनासो आयो ।’
उनले बैंकले कर्जा दिन तयार भएपनि निक्षेपकर्ताको पैसा लगानी गर्दा त्यसको सावाँ र थोरै ब्याज फिर्ता हुने सुनिश्चितता खोज्नुपर्ने बताए । ‘कर्जा दिन बैंक तयार छौं तर, हाम्रो किसानले कर्जा लिएर ब्याज तिर्ने मात्रै हैन, त्यसबाट आम्दानी गर्न ‘इको सिस्टम’ बनाउनुपर्छ’, उनले भने, ‘बैंक किसान र कृषिमा लगानी गर्ने भनेर अगाडी बढेका छौं । हामी प्रतिवद्धता जनाउँछौं, तर जबसम्म लगानी गरेको पैसाको साँवा र पैसा फिर्ता आउँछ भनेर देखिदैन लगानी गर्न समस्या हुन्छ ।’
बैंक भनेको निक्षेपकर्ताको पैसाबाट चल्ने भएकोले जबसम्म इकोसिस्टम बनेर त्यो पैसा सुरक्षित देखिदैन कृषि क्षेत्रमा समस्या रहने उनले बताए । उनका अनुसार अब त्यो ‘इको सिस्टम’ बनाउन बैंकहरु अगाडी बढ्छ । सावाँ र थोरै ब्याज उठ्छ भन्ने वातावरण देखिएपछि ५० हजार, ५ करोड र ५० करोडको कर्जा चाहिए पनि पछि बैंक हट्दैन ।
