तिब्बतबाट आएको भोटेकोसी बाढीले ४३० मेगावाट बिजुली प्रणालीबाट बाहिर

काठमाडौँ । भोटेकोसी नदीमा आएको बाढीका कारण ११ वटा जलविद्युत् आयोजनाबाट उत्पादित करिब ४०५ मेगावाट र २५ मेगावाट सौर्य विद्युत् गरी कुल ४३० मेगावाट विद्युत् राष्ट्रिय प्रणालीबाट विच्छेद भएको छ । बाढीका कारण प्रभावित जलविद्युत् आयोजनाका उत्पादन तथा विद्युत् प्रसारण संरचनामा क्षति पुगेपछि ती आयोजनाबाट विद्युत् उत्पादन तथा आपूर्ति अवरुद्ध भएको हो ।

त्यसबाट मुलुकको विद्युत् प्रणालीमा एकैपटक ठूलो परिमाणमा विद्युत् उपलब्धता घटेको छ । भोटेकोसी करिडोरमा रहेका जलविद्युत् आयोजनाका विद्युत् गृह, प्रसारण लाइन तथा अन्य संरचनामा बाढी र पहिरोले क्षति पुर्‍याएको प्रारम्भिक विवरण छ । क्षतिको विस्तृत विवरण तथा कुन–कुन आयोजनाको उत्पादन कति समयसम्म प्रभावित हुन्छ भन्ने यकिन हुन बाँकी रहेको नेपाल विद्युत् प्राधिकरणले जानकारी दिएको छ ।

एकैपटक ४३० मेगावाट विद्युत् प्रणालीबाट बाहिरिँदा विद्युत् आपूर्ति व्यवस्थापनमा समेत दबाब परेको छ । विशेषतः वर्षामा उत्पादन उच्च हुने समयमा ठूलो क्षमताका आयोजना बन्द हुँदा प्रणालीको सञ्चालन तथा विद्युत् आपूर्तिमा चुनौती थपिएको छ ।

प्राधिकरण तथा सम्बन्धित निकाय तथा आयोजना प्रवर्द्धकहरूले बाढीबाट भएको क्षतिको मूल्याङ्कन तथा अवरुद्ध संरचना पुनःस्थापनाको काम अघि बढाउने तयारी गरेका छन् । क्षतिको अवस्था र पुनःनिर्माणको समयअनुसार प्रभावित आयोजनाबाट विद्युत् उत्पादन पुनः सुरु हुन समय लाग्न सक्ने देखिएको छ ।

भोटेकोसीमा आएको बाढीले जलविद्युत् आयोजनामात्र नभई सडक, पुल, प्रसारण तथा वितरण संरचनामा समेत क्षति पुर्‍याएको छ । पछिल्लो घटनाले जलविद्युत् आयोजनाको विकाससँगै बाढी, पहिरो तथा जलवायुजन्य जोखिमबाट ऊर्जा पूर्वाधारको सुरक्षा र जोखिम व्यवस्थापन थप जोखिम बन्दै गएको छ ।

बाढीले क्षतिग्रस्त जलविद्युत् आयोजनाको विवरण