ऊर्जा खबर
काठमाडौं । बागमती प्रदेश अन्तर्गत रसुवा जिल्लाको गोसाइकुण्ड गाउँपालिका स्थित नेपाल–चीन सिमाना नजिक रहेको मिनार्खु गाउँदेखि नुवाकोट जिल्लाको बेलकोटगढी नगरपालिकामा प्रस्तावित ४००/२०० केभी राटमाटे सबस्टेससम्मको प्रसारण लाइनको वातावरणीय प्रभाव मुल्याङ्कन क्षेत्र निर्धारण गर्न राय/सुझाव माग गरिएको छ ।
नेपाल विद्युत प्राधिकरणले निर्माण गर्न लागेको आयोजनाको क्षेत्रधिकार निर्धारण गर्न सरोकारवालासँग राय/सुझाव माग गरिएको हो । स्थानीय सरोकारवालासँग आयोजना निर्माण गर्दा पर्न सक्ने भौतिक, जैविक, सामाजिक तथा सांस्कृतिक वातावरणीय प्रभावका सम्बन्धमा राय/सुझाव मागिएको छ ।
प्रभावितले आगामी ७ दिनभित्र आइपुग्ने गरी आफ्नो राय/सुझाव प्राधिकरणको कार्यलय वा परामर्शदाता कम्पनी एनइए इन्जिनियरीङ कम्पनी लिमिटेडको कार्यालयमा पठाउनुपर्नेछ ।
७० किलोमिटर लामो ४०० केभी रातमाटे–रसुवागढी–केरुङ प्रसारण लाइन नेपाल र चीनबीचको अन्तरदेशिय प्रसारण लाइन हो । यो लाइन पूरा भएपछि ५००० मेगावाट विद्युत प्रवाह हुने प्राधिकरणले जनाएकाे छ ।
प्रस्तावित लाइनलाई एक बिन्दुबाट अर्को बिन्दुमा लैजान जम्मा २०८ वटा टावर निर्माण गरिनेछ । एपी–० देखि एपी–११ सम्म करिब ४.५ किलोमिटर लाइन लाङटाङ राष्ट्रिय निकुञ्ज क्षेत्रभित्र पर्दछ । आयोजनाको क्षेत्र अधिकार जम्मा ४६ मिटर (मध्य विब्दुबाट दायाँ/बाँया गरी २३/२३ मिटर) हुनेछ ।
