ऊर्जा खबर
काठमाडौं । रसुवा जिल्लाभित्र सञ्चालित विभिन्न सडकखण्डहरूको सञ्चालनको जिम्मा जलविद्युत आयोजनालाई दिइएको छ । जिल्ला विपद व्यवस्थापन समिति, रसुवाको मंगलबार (असार १४ गते) बसेको बैठकले सडक सञ्चालनको जिम्मा ६ जलविद्युत आयोजनालाई दिने निर्णय गरेको हो ।
यस पटक (२०७९) को बर्खा अवधिभर जिल्लाको ८ सडकखण्ड सञ्चालनको जिम्मा ६ जलविद्युत आयोजना र २ गाउँपालिकालाई दिइएको छ । जिम्मा पाएका निकायले वर्षातको समयमा जिल्ला अन्तर्गतका सडकहरू अवरुद्ध भएमा सुचारु गर्ने व्यवस्था मिलाउनुपर्नेछ ।
बेतावती–मैलुङ–बाह्र घुम्ती सडकखण्डको जिम्मा माथिल्लो मैलुङ जलविद्युत आयोजना र माथिल्लो त्रिशुली–१ जलविद्युत आयोजनाले पाएका छन् । यस्तै, धुन्चे–स्याफ्रुबेशी सडकखण्डको जिम्मा लाङटाङ खोला जलविद्युत आयोजनाले, स्याफ्रुबेशी–कुलुङपुलसम्मकाृे सडकखण्ड सान्जेन जलविद्युत आयोजनाले, कुलुङपुल–रसुवागढी सडकखण्डको जिम्मा रसुवागढी जलविद्युत आयोजनाले पाएका छन ।
स्याफ्रुबेसी–थाम्बुचेत–गत्लाङ सडकखण्डको लाङटाङ भोटेकोसी जलविद्युत आयोजनाले र रुँगा–पाजुङ–तातोपानी सडकखण्डको जिम्मा सान्जेन खोला जलविद्युत आयोजनाले पाएका छन् ।
यस्तै, बेत्रावती–कालीका–राम्चे–ठाँडे–धुन्चे सडकखण्ड कालिका गाउँपालिकाले र बेत्रावती–भोर्ले–पाच्र्याङ–यार्सा सडकखण्ड नौकुण्ड गाउँपालिकाले सञ्चालन गर्नेछ । यी निकायले याे बर्खाकाे समयका ताेकिएकाे सडकमा समस्या आए समाधानकाे व्यवस्था मिलाएर सुचारू गर्नेछन् ।
