ऊर्जा खबर
काठमाडौँ । राष्ट्रिय स्वतन्त्र पार्टी (रास्वपा) का सांसद द्वय श्रीराम न्याैपाने र सागर ढकाल चिलिमे जलविद्युत् केन्द्रमा पुगेका छन् । रसुवाको स्याफ्रुबेँसीस्थित केन्द्रको भूमिगत विद्युत्गृह तथा सुरुङ क्षेत्रमा फसेकाहरूको उद्धारमा सघाउन उनीहरु त्यहाँ पुगेका हुन् ।
स्थलगत अवस्थाको अनुगमनपछि उनीहरू उद्धार कार्यलाई सहज बनाउन समन्वयमा जुटेका छन् । उक्त क्षेत्रको वस्तुस्थितिबारे जानकारी दिँदै सांसद ढकालले तत्काल 'ब्लास्ट' गरेर बाटो खोल्ने झन्झटमा नपरी उद्धार कार्यलाई प्राथमिकता दिन सेनालाई आग्रह गरिएको बताएका छन् । ब्लास्ट नगरिकन बाटोको निश्चित भाग मात्र खुलाउन सके पनि उद्धार तथा राहतको काम धेरै नै सहज हुने उनको भनाइ छ ।
'श्रीराम सर र म भर्खर चिलिमे पुग्यौँ, तत्काल ब्लास्ट गरेर बाटो खोल्न अल्झिन नपर्ने कुरा आर्मीलाई भनिसकेका छौँ सांसद ढकालले भने, 'यति मात्र खोल्यो भने रेस्क्यु काम धेरै नै सजिलो हुन्छ । अरु सहजका कार्य सोच्दै छौँ,'
प्रतिकूल परिस्थितिमा पनि उद्धार कार्यलाई कसरी थप प्रभावकारी र सहज बनाउन सकिन्छ भन्ने विषयमा थप उपायहरू खोज्ने काम भइरहेको उनले जानकारी दिएका छन् । चिलिमे क्षेत्रमा पछिल्लो समय देखिएको समस्या र अवरुद्ध बाटोका कारण उद्धारमा कठिनाइ भइरहेका बेला जनप्रतिनिधिको यो प्रत्यक्ष उपस्थिति र समन्वयले उद्धार कार्यमा सहयोग पुग्ने अपेक्षा गरिएको छ ।
पेशाले इन्जिनियर रहेका यी दुवै सांसद यसअघि माथिल्लो त्रिशूली ३ 'ए' जलविद्युत् आयोजनाको सुरुङमा फसकेकाहरूको उद्धारमा जुटेका थिए । त्यहाँबाट २ जना कर्मचारीको सकुशल उद्धार गरिएको थियो ।
