ऊर्जा खबर
काठमाडाैँ । नेपाल विद्युत् प्राधिकरणले कञ्चनपुरको पुनर्वास नगरपालिका क्षेत्रमा ३३/११ केभी, ६/८ एमभिए क्षमताको पुनर्वास सबस्टेसन निर्माण सम्पन्न गरी सञ्चालनमा ल्याएको छ । सबस्टेसन सञ्चालनमा आएपछि करिब १८ हजार ग्राहक प्रत्यक्ष रूपमा लाभान्वित भएका छन् ।
उक्त सबस्टेसन निर्माणका लागि यसअघि ठेक्का सम्झौता गरिएको भए पनि सम्बन्धित निर्माण व्यवसायीले सिभिल कार्यबाहेक आवश्यक इलेक्ट्रोमेकानिकल कार्य सम्पन्न नगरेपछि ठेक्का सम्झौता रद्द गरिएको थियो । यस क्षेत्रमा लामो समयदेखि न्यून भोल्टेज तथा विद्युत् आपूर्तिसम्बन्धी समस्याका कारण स्थानीय उपभोक्ताबाट व्यापक गुनासो आएपछि तत्काल वैकल्पिक व्यवस्था गरी सबस्टेसन निर्माण कार्य शीघ्र सम्पन्न गर्न निर्देशन दिइएपछि हाल सबस्टेसन सञ्चालनमा आएको प्राधिकरणका कामु कार्यकारी निर्देशक दीर्घायु कुमार श्रेष्ठले बताए ।
निर्देशनअनुसार बेलौरी वितरण केन्द्रले नेपाल विद्युत् प्राधिकरणको विभिन्न कार्यालयमा रहेका ६–८ एमभिएको ट्रान्सफर्मरसहित आवश्यक उपकरणको उपयोग गरी बाँकी निर्माण तथा जडान कार्य द्रुत गतिमा सम्पन्न गर्दै सबस्टेसन सञ्चालनमा ल्याएको हो ।
'बेलौरी वितरण केन्द्रको नियन्त्रणमा रहने उक्त सबस्टेसन सञ्चालनमा आएसँगै उक्त क्षेत्रका ग्राहकलाई भरपर्दो विद्युत् आपूर्ति गर्न सहज हुनेछ', श्रेष्ठले भने । यस कार्य प्राधिकरण, सुदूरपश्चिम प्रादेशिक कार्यालयको अग्रसरतामा सम्पन्न भएको हो । अब बेलौरी वितरण केन्द्रअन्तर्गतका करिब १८ हजार ग्राहक सबस्टेसनबाट प्रत्यक्ष रूपमा लाभान्वित हुनेछन् ।
'यसबाट विद्युत् आपूर्तिको गुणस्तरमा उल्लेखनीय सुधार आउनुका साथै भविष्यको बढ्दो विद्युत् माग व्यवस्थापन गर्न पनि सहज हुनेछ', श्रेष्ठले भने । प्राधिकरणले सबस्टेशन सञ्चालनमा आएसँगै पुनर्वास क्षेत्रको विद्युत् आपूर्ति प्रणाली थप स्थिर, भरपर्दो र गुणस्तरीय बन्ने विश्वास व्यक्त गरेको छ ।
