सागर केसी
दोलखा । अविरल वर्षापछि गएराति आएको बाढीपहिरोले गौरीशङ्कर गाउँपालिका–९ मूलखर्कमा अवस्थित १० मेगावाटको सिप्रिङ खोला जलविद्युत् केन्द्रको बाँध संरचनामा क्षति पुर्याएको छ । राति ११ र १२ बजेतिर ठूलो पहिरो आउँदा ठूलो क्षति पुगेको हो ।
मध्यरातमा पहिरो आएपछि बाँध क्षेत्रमा रहेका ४ कर्मचारी नजिकैको ओडारमा आश्रय लिएर ज्यान जोगाएको केन्द्रका कर्मचारी यादव आचार्यले जानकारी दिए । उनका अनुसार पहिरोले आयोजनाको बाँध, बालुवा थिग्राउने पोखरी र आवासगृह पुरिएका छन् ।
उद्धारका लागि जगतबाट बिहानै सुरक्षाकर्मीको टोली घटनास्थलतर्फ गएका छन् । सडकको पहुँचको अभावका कारण उक्त स्थानमा पैदलै जानुपर्ने बाध्यता छ ।
बाँध क्षेत्रका धेरैजसो संरचनामा क्षति पुगेपछि केन्द्रको विद्युत् उत्पादन ठप्प भएको छ । सिनर्जी पावर लिमिटेडले प्रवर्द्धन गरेको उक्त विद्युत् केन्द्रले १२ वर्षदेखि विद्युत् उत्पादन गर्दै आएको थियो ।
