४६ मेगावाटको माथिल्लो बलेफीको पिपिए सम्पन्न

काठमाडौं । जलविद्युत् र सौर्य विद्युत आयोजनामा लगानी गर्दै आएको गोल्यान समूहको लगानीमा सिन्धुपाल्चोक जिल्लाको जुगल गाउँपालिकामा निर्माण हुने ४६ मेगावाटको माथिल्लो बलेफी जलविद्युत् आयोजनाको विद्युत खरिद सम्झौता (पिपिए) भएको छ । नेपाल विद्युत प्राधिकरण र प्रवर्द्धक अप्पर बलेफी हाइड्रो पावर कम्पनीबीच विद्युत् खरिद बिक्री गर्ने सम्झौतापत्रमा हस्ताक्षर भएको हो ।

पिपिएमा प्राधिकरणको तर्फबाट कार्यकारी निर्देशक कुलमान घिसिङ तथा कम्पनीको तर्फबाट अध्यक्ष उमेश कसजुले हस्ताक्षर गरे । हस्ताक्षर कार्यक्रममा गोल्यान समूहको ऊर्जा डिभिजनका प्रमुख कार्यकारी अधिकृत प्रवीण अर्याल तथा प्रमुख वित्तीय अधिकृत सन्जय शाहको पनि उपस्थिती थियो ।

सम्झौता अनुसार प्राधिकरणले आयोजनाबाट उत्पादन भएको बिजुली बर्खामा प्रतियुनिट ४.८० रुपैयाँ र हिउँदमा प्रतियुनिट ८.४० रुपैयाँमा खरिद गर्नेछ ।

आयोजनाले उत्पादन गर्ने विद्युत् विद्युतगृहदेखि १० किलोमिटरमा दुरीमा बन्ने पाङटाङ सबस्टेसनमा लगेर जोडिनेछ । सबस्टेसनसम्म आवश्यक पर्ने १० किलोमिटर १३२ केभी प्रसारण लाइन प्रवर्द्धक कम्पनीले निर्माण गर्नेछ ।

गोल्यान समूहको सन् २०३० सम्ममा ९०० मेगावाट विद्युत राष्ट्रिय प्रसारण प्रणालीमा योगदान गर्ने लक्ष्य छ । यो ग्रुपको लगानीमा निर्माण सम्पन्न भएको ३६ मेगावाटको माथिल्लो बलेफी ‘ए’ ले नियमित विद्युत् उत्पादन गरिहेको छ । साथै, अन्य आयोजनाको पनि निर्माण प्रक्रिया अघि बढाएको छ ।

ग्रुपले जलविद्युत् सँगै सौर्य आयोजनामा पनि लगानी गरेको छ । ग्रुपको लगानी निर्माण सम्पन्न भएको १० मेगावाटको सौर्य आयोजनाको विद्युत् प्रणालीमा जाडिसकेको छ । थप १० मेगावाट विद्युत् जोडिने तयारीमा छ भने बाँकी ४० मेगावाटका आयोजनाको काम अघि बढाएको छ ।