ऊर्जा खबर
काठमाडौं । अमेरिकी सहयोग नियोगअन्तर्गतको मिलेनियम च्यालेन्ज एकाउन्ट विकास समिति (एमसिए) नेपालले पाँच सबस्टेसन निर्माण प्रक्रिया अघि बढाएको छ । एमसिए नेपालले ४ सय केभी क्षमताका पाँच ठूला सबस्टेसन निर्माण गर्न ठेक्का आह्वान गरेको हो ।
एमसिएले तीन लटमा सबस्टेसन निर्माण गर्न अन्तर्राष्ट्रिय बोलपपत्र (ग्लोबल टेन्डर) आह्वान गरेको छ । पहिलो लटमा रातोमाटे, लप्सिफेदी र न्यु हेटौंडा सबस्टेसन, दोस्रो लटमा बुटवल सबस्टेसन र तेस्रो लटमा दमौली सबस्टेसन बनाउने योजना छ ।
इच्छुकले आगामी २०२३ जुन ३० तारिख (२०८० असार ३० गते शुक्रबार) सम्म आवेदन दिनुपर्नेछ । प्रतिस्पर्धाबाट छनौट हुने निर्माण व्यवसायीले सबस्टेसनको डिजाइन, आपूर्ति, जडान, परीक्षण सञ्चालन गर्नुपर्ने छ ।
सबस्टेसनका लागि थोरै जग्गा आवश्यक पर्ने भएकाले अधिग्रहणको काम पनि सकिएको एमसिए नेपालले जनाएको छ । सबस्टेसन पूरा भएपछि काठमाडौं, नुवाकोट, हेटौंडा, दमौली, बुटवल र प्रस्तावित बुटबल–गोरखपुर ४ सय केभी अन्तरदेशीय प्रसारण लाइन हुँदै भारतमा बिजुली पुग्ने छ ।
एमसिए नेपालले २०२२ नोभेम्बर २८ मा प्रसारण लाइन निर्माणका लागि ठेक्का आह्वान गरेको थियो । लप्सिफेदी–रातमाटे–हेटौंडा १ सय १७ किलोमिटर, रातमाटे–न्युदमौली ९० किलोमिटर र न्युदमौली–भारत सीमासम्म १ सय ८ किलोमिटर गरी तीन प्याकेजमा प्रसारण लाइन निर्माण हुनेछ । प्रसारण लाइनको लम्बाइ ३ सय १४ किलोमिटर हुनेछ ।
