बैंकको ब्याज नियामक निकाय र वित्तीय संस्थाको नियन्त्रणले मात्र निर्धारण गर्दैन : वरिष्ठ ढकाल

काठमाडाैं । नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले बैंक तथा वित्तीय संस्थाको ब्याजदर नियामक निकाय तथा वित्तीय संस्थाको नियन्त्रणले मात्र निर्धारण नगर्ने बताएका छन् । इटहरी उद्योग वाणिज्य संघको २३ र २४औँ वार्षिक साधारणसभालाई सम्बोधन गर्दै उनले यस्तो बताएका हुन् ।

ग्लोबल आइएमई बैंकका अध्यक्ष समेत रहेका ढकालले कर्जाको व्याजदर कुनै एउटा बैंक तथा वित्तीय संस्था वा नियमनकारी निकायको मात्र नियन्त्रणमा नहुने बताए । ‘कर्जाको ब्याजमा विभिन्न आन्तरिक तथा बाह्य विषय वस्तुहरूको प्रभाव रहन्छ,’ उनले भने, ‘केही समय पहिले २–३ प्रतिशतको निक्षेपको ब्याज अहिले १०–११ प्रतिशतसम्म पुगेको छ । त्यसैले, कर्जाको ब्याज स्वतः बढेको हो ।’

बैंकले दिनेभन्दा अन्य व्यवसायमार्फत आउने प्रतिफल बढी हुने हुँदा ब्याजदर घट्दा आफूलाई पनि राहत पुग्ने पनि बताए । ‘म कुनै एउटा बैंकको सञ्चालक समितिको अध्यक्ष हो तर बैंकको सेयरको तुलनामा अन्य व्यवसायमा मेरो लगानी बढी छ । त्यसैले, अन्य व्यवसायबाट आउने प्रतिफल धेरै बढी हुन्छ ।’

केही व्यवसायीहरूले चुनावी एजेण्डा बनाउन खोज्दा बैंक र व्यवसायीबीचको दूरी बढेको उनको भनाइ थियो । राज्यको प्राथमिकता र आम जनतालाई सेवा पुग्ने व्यवसाय जसले नाफा सिजना गर्न सक्ने उनको धारणा थियो ।

आफू केही समयपछि महासंघको अध्यक्ष हुने हुँदा निजी क्षेत्रका मुद्दाहरूलाई लिएर अगाडि बढ्ने तथा जिल्ला, नगर उद्योग व्यवसायी संघहरूसँग एकसाथ हुने प्रतिबद्धता व्यक्त गरे । ‘तपाईंहरूले उठाउने हरेक मुद्दामा महासंघको समर्थन रहनेछ,’ उनले भने, ‘जिल्ला÷नगरका व्यवसायीहरूले सम्भावित योजना ल्याउनुभयो भने त्यसलाई राष्ट्रिय/अन्तर्राष्ट्रियरूपमा अगाडि बढाउने जिम्मा हाम्रो हुनेछ ।’