ऊर्जा खबर
काठमाडौं । विद्युत विकास विभागले अहिले (२०७९ असार १५ गते) सम्म कुल ८ हजार मेगावाट बढी क्षमताका आयोजनाकाे नाममा विद्युत उत्पादन अनुमतिपत्र जारी गरेको छ । सरकारी तथा निजी क्षेत्रले नेपालको विभिन्न ठाउँमा पहिचान गरीअध्ययन पूरा भएका उक्त क्षमताका आयोजनाकाे नाममा निर्माण अनुमतिपत्र जारी गरिएकाे हाे ।
विभागका अनुसार ८ हजार ७५ मेगावाटका आयोजनाकाे नाममा अनुमति जारी गरिएकाे छ । प्रदेश नम्बर १ को २४८२ मेगावाटकाआयोजना, बागमती प्रदेशको २१५६ मेगावाटका आयोजना, गण्डकी प्रदेशको २२४३ मेगावाटका आयोजना, लुम्बिनी प्रदेशको ६४ मेगावाटका आयोजना, कर्णाली प्रदेशको ९०६ मेगावाटका आयोजना र सुदुरपश्चिम प्रदेशको २२४ मेगावाटका आयोजनाले उत्पादन अनुमति पाएको विभागको तथ्याङ्कमा उल्लेख छ ।
उत्पादन अनुमति पाएका आयोजनामध्ये ५०० मेगावाट भन्दा माथिको ९०० मेगावाटका अरुण–३ आयोजना छ । याे आयोजना निर्माणाधीन छ । १०० मेगावाट क्षमतादेखि ५०० मेगावाट क्षमतासम्मका २९४८ मेगावाटका आयोजनाले पनि उत्पादन अनुमति पाएका छन् ।
यस्तै, २५ मेगावाट क्षमतादेखि १०० मेगावाटसम्मको २९०० मेगावाटका आयोजना, ५ मेगावाट क्षमतादेखि २५ मेगावाटसम्मको ११८० मेगावाटका आयोजना र ५ मेगावाट भन्दा कम क्षमताको १४७ मेगावाटका आयोजनाले उत्पादन अनुमति पाएको विभागले जनाएको छ ।
अनुमति पाएका आयोजनामध्ये ३३०० मेगावाटका आयोजना मात्र निर्माणाधीन अवस्थामा रहेकाे नेपाल विद्युत प्राधिकरणले जनाएकाे छ । बाँकी निर्माणमा जाने तयारीमा वा वित्तिय व्यवस्थापन र विद्युत खरिद सम्झौता (पिपिए) का लागि पालाे कुरेर बसेका आयोजना छन् ।
