ऊर्जा खबर
नेपाल वायुसेवा निगमबाट यात्रा गर्न अब घरमै बसेर टिकट लिन सकिनेछ । निगम र इ–सेवाबीच सम्झौता भएकाले यस्तो सुविधा उपयोग गर्न सकिने भएको हो ।
दुवै पक्षबीच सोमबार अनलाइन टिकटिङका लागि सम्झौता भएको छ । सम्झौतापत्रमा निगमका महाप्रबन्धक सुगतरत्न कंसाकार र इ–सेवाका प्रमुख कार्यकारी अधिकृत रोशन लामिछाने हस्ताक्षर गरेका छन् ।
सम्झौतासँगै इ–सेवाबाट सोमबारदेखि नै निगमको आन्तरिक तथा बाह्य उडानका टिकट खरिद गर्न सकिनेछ । यसअघि इ–सेवाबाट बुद्ध, श्री, यति, सिम्रिक र सौर्य एयरलाइन्सको टिकट खरिद गर्न सकिन्थ्यो ।
निगमले हालैमात्र २ सय ७४ सिटको वाइड बडी जहाज सञ्चालनमा ल्याएको छ । निगमको बजार विस्तारलाई अनलाइन टिकटिङले पनि सहयोग पुर्याउने विश्वास लिइएको छ । इ–सेवा नेपाल राष्ट्र बैंकबाट अनुमति प्राप्त देशकै पेमेन्ट गेटवे हो ।
उक्त सेवाबाट मोबाइल, टेलिफोन, इन्टरनेट, बिजुली तथा खानेपानीको महसुल भुक्तानी, रिचार्ज, हवाइजहाज, बसको टिकट, स्कुल कलेजको शुल्क लगायतका सेवामा शुल्क भुक्तानी गर्न सकिन्छ । यसमा हाल ४६ वटा बैंक सदस्य छन् ।
