ऊर्जा खबर
काठमाडौं । सरकारले १०६१ मेगावाटको माथिल्लो अरुण र ६३५ मेगावाटको दुधकोसी जलविद्युत आयोजनाका लागि १ अर्ब ९४ करोड रुपैयाँ रकम विनियोजन गरेको छ ।
आइतबार अर्थमन्त्री जनार्दन शर्माले संसदको दुवै सदनमा आगामी आवको बजेट तथा कार्यक्रम प्रस्तुत गर्दै यस्तो बताएका हुन् । माथिल्लो अरुणका लागि १ अर्ब र दुधकोसीका लागि ९४ करोड रकम छुट्याइएको छ ।
जलाशययुक्त १२०० मेगावाटको बुढीगण्डकी, ४१० मेगावाटको नलगाड आयोजना निर्माणको लागि लगानी स्रोत व्यवस्थापन गरी अघि बढाइनेछ । ७५० मेगावाटको पश्चिम सेती र ३०९ मेगावाटको सेतीको प्राविधिक तयारी गरी अघि बढाइनेछ । पन्चेश्वर बहुउद्देश्य आयोजना निर्माणका लागि नेपालको तर्फबाट गरिने काम अघि बढाइनेछ ।
