ऊर्जा खबर
काठमाडौं । सरकारले बैशाख यता ९० मेगावाटका विद्युत आयोजना निर्माण गर्न अनुमतिपत्र जारी गरेको छ । अध्ययन पूरा भएका जलविद्युत र सौर्य आयोजनाबाट विद्युत उत्पादन गर्न उत्पादक कम्पनी, निजी विद्युत कम्पनीको नाममा निर्माण अनुमति जारी गरेको हाे ।
विद्युत विकास विभागका अनुसार २०७९ बैशाखदेखि हालसम्मको अवधिमा सो क्षमताको विद्युत उत्पादन गर्न अनुमतिपत्र जारी गरिएको छ । जसमा जलविद्युतबाट ७२ मेगावाट विद्युत उत्पादन गर्न २ आयोजनाले र सौर्यबाट २० मेगावाट विद्युत उत्पादन गर्न ३ आयोजनाले अनुमति पाएका छन।
५७ मेगावाटको हिमचुली दोर्दी र १५ मेगावाटको माथिल्लो ठुलो खोला जलविद्युत आयोजनाले उत्पादन अनुमति पाएका छन् । पिपुल्स हाइड्रो पावर कम्पनीले लमजुङमा अध्ययन पूरा गरेको हिमचुली दोर्दी आयोजनाले २०७९ बैशाख २८ गते उत्पादन अनुमति पाएको हो ।
ठुलो खोला हाइड्रो पावरले म्याग्दीमा अध्ययन पूरा गरेको माथिल्लो ठुलो खोलाले जेठ ९ गते उत्पादन अनुमति पाएको छ ।
यस्तै, नेपाल विद्युत प्राधिकरणले नुवाकोटमा १० मेगावाटका दुई सौर्य आयोजना निर्माण गर्न अनुमति पाएको विभागको तथ्याङ्कमा उल्लेख छ । प्राधिकरणले यी आयोजना अघि बढाउन बैशाख ६ गते अनुमति पाएको हो ।
झापा इनर्जी लिमिटेडले पनि १० मेगावाटको सौर्य आयोजना अघि बढाउन अनुमति पाएको छ । झापामा अध्ययन सम्पन्न गरेको कम्पनीको नाममा विभागले बैशाख ११ गते उत्पादन अनुमति जारी गरेको थियो ।
हालसम्म ७ हजार ३ सय ३० मेगावाटका जलविद्युत र सौर्य विद्युत आयोजनाले निर्माण अनुमति पाएको विभागको तथ्याङ्कमा उल्लेख छ ।
.jpg)
