ऊर्जा खबर
काठमाडौँ । एमसिसी नेपाल कम्प्याक्टअन्तर्गत नवलपरासी (बर्दघाट सुस्ता पश्चिम) मा निर्माण भइरहेको ४०० केभी नयाँ बुटवल सबस्टेसनको निर्माण कार्यले तीव्रता पाएको छ । आयोजना स्थलमा हाल ग्यास इन्सुलेटेड सबस्टेशन (जिआइएस) भवन, नियन्त्रण कक्ष (कन्ट्रोल बिल्डिङ), ट्रान्सफर्मर फाउन्डेसन, ग्यान्ट्री तथा अन्य आवश्यक उपकरणका फाउन्डेसन निर्माणका कामहरू तीव्र गतिमा अघि बढिरहेको एमसिए नेपालले जनाएको छ ।
यस सबस्टेसन निर्माणका लागि एमसिए-नेपाल र भारतीय निर्माण कम्पनी लिङ्क्सन इन्डिया प्रालिबिच २०८१ वैशाख २७ गते ठेक्का सम्झौता भएको थियो । कुल ३ करोड ५५ लाख १० हजार अमेरिकी डलर (करिब ४ अर्ब ७५ करोड रूपैयाँ) को लागतको यस आयोजनाको निर्माण कार्य सम्झौता लगत्तै सुरु गरिएको थियो ।
ठेक्का सम्झौता अनुसार आयोजनाको कुल निर्माण अवधि ३९ महिना तोकिएको छ । जसअनुसार आगामी २०८४ साउनभित्र यस ४०० केभी जिआइएस सबस्टेसनको निर्माण कार्य सम्पन्न गर्ने लक्ष्य राखिएको छ ।
यो सबस्टेसन निर्माण सम्पन्न भएसँगै यसले नेपालको विद्युत् प्रसारण प्रणालीलाई थप सुदृढ र भरपर्दो बनाउनुका साथै बुटवल-गोरखपुर अन्तरदेशीय विद्युत् व्यापारका लागि समेत महत्त्वपूर्ण ढोका खोल्ने छ । आगामी वर्षहरूमा मुलुकभित्र निरन्तर तथा गुणस्तरीय विद्युत् आपूर्ति सुनिश्चित गर्नका लागि यो सबस्टेसन एक प्रमुख पूर्वाधारका रूपमा रहनेछ ।
