ऊर्जा खबर
काठमाडौं । जिल्लाको ऋषिङ गाउँपालिका–१ झापुटारमा निर्माणाधीन १४० मेगावाटको तनहुँ जलविद्युत आयोजनाको विद्युत गृहतर्फ ११०० मिटर सुरुङ खन्ने काम सकिएको छ । १४५६ मिटर लामो सुरुङ खन्ने काम अन्तिम चरणमा पुगेको हो ।
निर्माणाधीन आयोजनाको ३५६ मिटर मात्र सुरुङ खन्न बाँकी रहेको आयोजनाले जनाएको छ । आयोजनाको ४३ प्रतिशत निर्माण सम्पन्न भइसकेको तनहुँ जलविद्युत लिमिटेडका प्रबन्ध सञ्चालक किरणकुमार श्रेष्ठले बताए ।
आयोजनाको प्याकेज–१ अन्तर्गत बाँध निर्माण कार्यको २५ प्रतिशत भौतिक प्रगति भएको छ । उक्त प्याकेजको ठेक्का सोङ दा–कालिका जेभीले पाएको छ । जेभीले २०७७ चैत ९ गते २१ अर्ब ६६ करोड ४० लाख ४१ हजार ८ सय ७८ रुपैयाँमा सम्झौता गरेको थियो ।
प्याकेज–२ अन्तर्गत १, २ र ३ को विद्युतगृह जाने सुरुङको सबै कार्य सम्पन्न भइसकेको छ । यस प्याकेजअन्तर्गत ६९ वटा विद्युत टावरको जग राख्ने कार्य भइरहेको छ । वन नीतिका कारण अहिले विद्युत टावर निर्माणमा समस्या भएको छ । उक्त प्याकेजको ४५ प्रतिशत भौतिक प्रगति भएको आयोजना प्रमुख राजाभाई शिल्पकारले जानकारी दिए ।
आयोजनाको विद्युत प्रवाह हुने ३४.७ किलोमिटर लामो प्रसारण लाइनमा ९४ वटा टावर राखिनेछ । हालसम्म करिब एक किलोमिटर प्रसारण लाइन जडान गरिएको आयोजनाले जनाएको छ । प्रसारण लाइनको सन् २०२२ मे सम्ममा सम्पन्न गर्ने लक्ष्य भएपनि वन क्षेत्रमा रुख कटानको स्वीकृति वन मन्त्रालयबाट प्राप्त हुन ढिलाइ भएका कारण सन २०२४ डिसेम्बर १९ सम्म थप गरिएको छ ।
त्यसैगरी, आयोजनाको प्याकेज २ अन्तर्गत सुरुङ, विद्युतगृह निर्माण र हाइड्रोमेकानिकल तथा इलेक्ट्रोमेकानिकल उपकरण आपूर्ति, जडान तथा सञ्चालन लगायतका कामको जिम्मेवारी सिनो हाइड्रो पावर लिमिटेडले पाएको छ । २०७५ असोज १५ गते ३ अर्ब ८३ करोड १३ लाख ६० हजार ३ सय ६१ रुपैयाँमा सम्झौता भएको थियो थियो । सिनो हाइड्रोपावर लिमिटेडले ८९ मिटर लम्बाइ, २२ मिटर चौडाइ र ५१ मिटर उचाइ भएको भूमिगृत विद्यृतगृहको सुरुङ खन्ने कार्य सम्पन्न भएको आयोजनाले जनाएको छ । विद्युतगृहको सुरुङ खन्ने काम सन् २०२० अगष्टदेखि सुरु भएको हो ।
प्याकेज ३ अन्तर्गत प्रसारण लाइन निर्माण भइरहेको छ । उक्त प्याकेजको कामका लागि केइसीसँग सन २०१८ डिसेम्बर २५ मा सम्झौता भएको थियो । उक्त प्याकेजको ६९ प्रतिशत भौतिक प्रगति भएको आयोजनाले जनाएको छ ।
