ऊर्जा खबर
काठमाडौँ । रुसले आगामी वैशाखमा हुने लगानी सम्मेलनमार्फत नेपालका विभिन्न क्षेत्रमा लगानी गर्ने योजना अघि सारेको छ । यसका लागि लगानीको क्षेत्र पहिचान गर्न रुसी प्रतिनिधिमण्डल बिहीबार नेपाल आउँदै छ ।
नेपालका लागि रुसी राजदूत अलेक्सेई नोभिकोभले रुसको उद्योग वाणिज्य संघको नेतृत्वमा लगानी सम्मेलनमार्फत् लगानी गर्न सकिने क्षेत्रको पहिचान गर्न प्रतिनिधिमण्डल नेपाल आउँदै गरेको बताए । बुधबार अर्थमन्त्री वर्षमान पुनलाई बधाई ज्ञापन गर्न अर्थ मन्त्रालय पुगेका रुसी राजदूत नोभिकोभले यस्तो जानकारी दिएका हुन् ।
भेटमा अर्थमन्त्री पुनले नेपालले आगामी वैशाख १६ र १७ गते आयोजना गर्न लागेको लगानी सम्मेलनमा बढीभन्दा बढी रुसी लगानीकर्ता आउने वातावरण बनाउन आग्रह गरे । जवाफमा राजदूत नोभिकोभले अर्थमन्त्री पुनको प्रस्ताव सकारात्मक रहेको बताउँदै रुसी लगानीकर्तासँग कुरा गर्ने प्रतिवद्धता जनाए । भू–राजनीतिक कारणले पनि नेपालमा रुसी लगानीका लागि अत्यन्तै सकारात्मक वातावरण रहेको उनको भनाइ थियो ।
यसैगरी, अर्थमन्त्री पुनले ठूला जलविद्युत् आयोजना र रासायनिक मल कारखानामा लगानी गर्न रुसलाई आग्रह गरेका छन् । ‘हामीले विद्युत् खपतका लागि अन्तर्राष्ट्रिय बजारको सुनिश्चितता गरिसकेका छौँ, अन्तर्राष्ट्रिय लगानीकर्ताका लागि नेपालमा जलविद्युत् उपयुक्त क्षेत्र हो’, अर्थमन्त्री पुनले भने, ‘सरकारले स्वदेशमै रासायनिक मल कारखाना खोल्ने नीति लिएको छ । यसमा लगानी गर्न रुस इच्छुक भएमा त्यसको वातावरण बनाउन हामी तयार छौँ ।’
नेपालका दुवै छिमेकी मुलुक चीन र भारतसँग रुसको राम्रो सम्बन्ध रहेको उल्लेख गर्दै नेपालका लागि रुसी राजदूत नोभिकोभले नेपाल–भारत सीमा क्षेत्रमा दुवै मुलुकलाई लक्षित गरी मल कारखाना खोल्ने वा उत्पादित सामग्री ल्याएर बेच्न सकिने सम्भावना रहेको औँल्याए ।
