ऊर्जा खबर
काठमाडौं । देशको विभिन्न ठाउँमा पहिचान भएका ६ हजार ५ सय मेगावाटभन्दा बढी क्षमताका २४ जलविद्युत आयोजनाहरू अध्ययनको विभिन्न चरणमा रहेका छन् ।
विद्युत विकास विभागका अनुसार ६५८२.२१ मेगावाट बराबरको २४ जलविद्युत आयोजनाको अध्ययन भइरहेको छ । अध्ययनरत आयोजनाहरूमध्ये ५२८३.३३ मेगावाटका १० जलाशय, १०२६.२६ मेगावाटका ७ आंशिक जलाशय र २७२.६२ मेगावाट ७ नदी प्रवाही आयोजना रहेका छन् ।
अध्ययन भइरहेका आयोजनाहरूमध्ये सबैभन्दा ठूलो १५४७ मेगावाटको खिम्ती जलाशय रहेको छ । साथै, ३२२.१८ मेगावाटको भारबुङ, ५०० मेगवाटको कालिगण्डकी–२, ६२० मेगावाटको कालिगण्डकी बहुउद्देश्यीय, ६३ मेगावाटको कोखाजोर, ३५० मेगावाटको तल्लो बडीगाड खाेला, १६५ मेगावाटको मादी सिटी, ५५ मेगावाटको मनहरी खोला, ९७८ मेगावाटको सुनकोसी–२ र ६८३ मेगावाटको सुनकोसी–३ जलाशाय विभागले अध्ययन गरिरहेको छ ।
यसैगरी, ९९.९८ मेगावाटको डाँडागाउँ खलंगा, १०.८० मेगावाटको हिमा खोला, ६१.०२ मेगावाटको हुम्ला कर्णाली, ६८४.४४ मेगावाटको हुम्ला कर्णाली क्यास्केड, ४२ मेगावाटको मर्स्याङ्दी–३, ९३.०२ मेगावाटको मुगु कर्णाली, ३५ मेगावाटको तिला रिभर आंशिक जलाशाय आयोजनाको अध्ययन भइरहेको विभागको तथ्यांकमा उल्लेख छ ।
२७.९० मेगावाटको मध्य इन्खु, ३४.९३ मेगावाटको सुपर बूढीगण्डकी, ५३.८५ मेगावामा माथिल्लो चमेलिया लगायत अन्य ४ नदी प्रवाही आयोजना पनि अध्ययनको चरणमा रहेका छन् ।
